šinjorina

Eko la, da se i ja jeno malo javin.

Ne znan ča da rečen, osim da žalin udrugu U ime obitelji i njoje članove. Ne zato ča se moj stav ne poklapa z njihovin, valja svaki ima pravo pensati ča ga je volja, ča ne? Ali kad čovik drugen čoviku počne stripljati s kin bi triba spati, ča bi triba delati, kako bi triba hoditi i koliko puti na dan bi triba poj srati u kundot... E to je onda diskriminacija. Otkud bilo kemu od nas pravo da odlučujemo za druge, a još pogotovo ko nas se to uopće ne tiče? Ko je čovik jeno malo zdrav u glavi, neće delati štupidece i nametati svoje mišljenje kako da je jedino ispravno. Ali, to je problem. U ime obitelji nisu zdravi u glavi. Vrag će njin pojisti dušu.

Dugo već pensan zašto to delaju, ča hi tira na takove stvari? Neka prvi hite stinu ko su bez griha. Najprije mi se učinilo da su forši sami gay, barem niki od njih, i da kroz uvu uvrnutu kampanju ustvari liče svoje frustracije još iz djetinjstva. Ki zna na ča su hi tirali roditelji i njihov tobožnji katoličko-viktorijanski odgoj. Forši su već svi skupa bili u ludnici, da se "zliče" od pederluka. Zbog tih svojih strahova forši danas i delaju slabo drugima. Takovih sigurno je u udruzi.

A forši jednostavno imaju profit od svega. Jer ča bi normalan čovik toliko gubija vrime na pizdarije kao ča je jedan uvakov apsurdan referendum ki u pitanje dovodi temeljna ljudska prava. Ja ne vidin zašto bi niki to toliko forsira osim ko i sam nima koristi od svega. Ča vi pensate?

Eko, vidite, tako je počelo z izopćavanjen Židova, Roma i mnogih drugih skupina kroz povijest. Niki su sami proživili ratove, logore, ubijanja, silovanja, maltretiranja. Ne ponovilo se. Ni Drugi svjetski, ni Domovinski, i nanke jedan drugi. A oni jušto to i delaju. I kadi njin je tote vjernički nauk? Oni uopće ne kape te svoje Bojže zapovjedi. Pa ča to se tako dela? Ča bi njin reka papa Franjo, ki mi se para stvarno kul, da hi čuje? Ča bi njin peno Isus reka?

Sram neka hi bude. Ja prema takovin ljudima moren osjećati jedino žaljenje. Lako da se igraju mačka i miša, ma uvi se igraju boga. Svaštor su si uzeli za pravo.

I na kraju se skuživan ča je cili moj tekst napisan u dijalektu, ne znan koliko ćete kapiti, ali u ovoj državi očigledno svaki dela ča ga je volja, boga vero ću odsad to delati anke ja. Ko oni šire svoju mržnju i homofobiju kroz obmane i laži na svaken koraku, a orko dindijo, ča ne bin i ja mogla pisati unako kako mi dojde, po domaću.

Bog će hi kaštigati. Sve dojde na svoje, sve gre ukrug. Anke ko rasplet referenduma bude nikakov, nikad ne zabite, ljudi moji, da nan sve dojde na naplatu, kad-tad... To je uno ča nas svih triba držati žive. Živili sto lit!!!